O Protectón, coma o seu nome suxire, é un modelo de protección acolchada para cando as cousas se poñen interesantes e as pernas corren risco de recibir golpes. O pantalón en sí componse de dúas pezas distintas: un set acolchado (combinación de varias capas de grosa loneta de cotón cunha capa fina e elástica de foam) e unha parte externa "decorativa" ao estilo do Pascalón ou Lansquetón habitual.

  Aínda que en principio ofrecíase a posibilidade de encargar ámbalas dúas pezas unidas na cintura, non tardamos en decatarnos de que resultaba moito máis práctico telas por separado. A pesares de saír lixeiramente máis caro, as vantaxes en cuestión de hixiene (aireado e secado da prenda interior), versatilidade (a peza externa pode vestirse de xeito independente no caso de así desexalo) e comodidade de transporte e almaceaxe fan que pague moito a pena.

​

  A peza acolchada ofrece unha protección media fronte aos golpes: máis que o típico pantalón de esgrima de 350N, pero menos que pads grosos e semirríxidos de foam ou, por suposto, proteccións de plástico (estilo policial, etc.). O obxectivo é conseguir un compromiso equilibrado entre protección, mobilidade e estética.

​

   O deseño é totalmente compatible con proteccións para os xeonllos.